區議會選舉就到喇，一班實事區議員同佢哋嘅助選團梗係要落區派傳單宣傳下啦～噚日旺角太平道就有幾個派傳單專心程度達100分嘅助選團出現咗喇！

片段入面可以見到有幾個著綠色背心嘅助選團企喺馬路邊，好落力咁向街坊派傳單。

路邊有個廢青非常唔小心咁喺手推車度碌咗好多支飲品出馬路，跟住就有幾個多管閒事嘅路人甲乙丙丁走埋去幫手執返啲逃走嘅飲品。

再睇返幾位助選團哥哥姐姐呀，佢哋依然一步都冇離開過崗位，繼續專注咁派傳單，完全冇畀亂入嘅飲品同大頭蝦廢青擾亂，表現十分之專業！

有網民串佢哋唔係真心為社區服務喎，傻豬嚟嘅，佢哋只係唔想為咗一張選票，放棄千千萬萬張選票啫（應該係）！

封面圖片、資料來源：Kevin Lam/ 小心駕駛(討論別人駕駛態度)