今日毛毛豬上網見到有個港男喺討論區話自己平時會帶兩個銀包返工，好古怪呀，真係㗎？典解嘅？唔通佢多錢到要兩個銀包要放得晒？唔通畀毛毛豬搵到隻潛力股？！

原來佢一個銀包放多錢啲，一個放少錢啲，睇下同邊個食飯，一時扮有錢仔一扮窮L呀。唓～你估淨係得你識咩，毛毛豬都一樣有兩手準備㗎～

自己一個嘅時候，個袋梗係要有齊一切裝備，帶晒褸仔遮仔風扇仔，連支cream都帶埋出街，應付到任何情況；但對住男朋友就乜都唔帶，最多帶支唇膏咪夠囉～想佢借褸畀自己，落雨又遮埋我嘛～

自己一個嘅時候就幾放肆都得，頭盤+餐湯+意粉再加多個甜品都食得落，但一對住男朋友，就扮細食，淨係食幾條沙律菜就夠。

自己去shopping拎幾多袋戰利品都冇問題！但係遇男友我即刻變細力，連開支水都話開唔到，要佢幫我～

平時就醒醒目目，但對住男朋友仔就變到成個bb仔咁，淨係識問「真係㗎？典解嘅？好叻呀！」

港男識帶兩個銀包出街，毛毛豬都一樣識！自己去shopping就帶個大銀包，放晒啲cash薯、信用卡同會員卡。同男友出街？唔使帶咁多嘢啦，銀包放張sweet sweet 即影即有咪夠囉～

封面圖片、資料來源：香港討論區