毛毛覺得「鄰居」呢個詞語就快喺廣東話入面消失㗎喇，你知唔知隔離屋貴姓吖？朝早撞到有冇打照呼吖？而呢個地方就連鄰居同朝早經過嘅校巴都好有愛呀！

正所謂 i go to school by bus，從前有一架校巴每一日都載住小朋友行同一條路返學，每日經過一間屋嘅時候都會有個婆婆同佢哋揮手，班小朋友都習慣咗每日都同返呢個婆婆揮手打招呼。

點知突然間有一日校巴司機同班小朋友經過呢間屋嘅時候，發現日日同佢哋打照呼嘅婆婆唔見咗呀！

佢哋雖然唔知道呢個婆婆叫咩名，但係咁多年來日日同佢打照呼，班小朋友唔見咗婆婆都覺得好傷心。校巴司機決定去嗰間屋問婆婆去咗邊度，原來93歲婆婆中咗風入咗醫院呀！班小朋友知道婆婆喺醫院唔可以日日見到佢哋返學，於是影咗呢張同婆婆日日見到佢哋嘅情景一樣嘅相，同埋寫咗張慰問咭畀佢。
婆婆出院嗰日，班小朋友仲佈置咗架校巴歡迎佢返屋企?，婆婆你要身體健康呀！班小朋友真係好錫你呀！

其實毛毛都好羨慕呢種親人一樣嘅鄰舍關係，不過喺香港，你啱啱先問完隔離屋阿陳生貴姓，下個星期想同佢講聲得閒飲茶嘅時候就會發現佢已經畀人加租逼遷咗喇。

來源：king5.com