最近世衞宣佈將加工肉列入1級致癌物，即係話食腸仔火腿煙肉餐肉漢堡扒，就好似食煙咁大劑呀！你可能諗，唓唔食囉咪。少年，你諗得太簡單喇。冇得食呢啲加工肉，到底會唔會令我哋嘅生活180度轉變呢？毛毛唔口水多過茶喇，直接用例子答你：

早餐唔好食腸仔包喇，毒呀，食空心包啦，乖。

最簡單最唔使用腦就嗌到嘅餐蛋麵都唔食得！食茶記常餐通常有腸仔、火腿、餐肉同煎蛋畀你揀兩個餸，而家乜都唔使揀喇，食煎蛋拼煎蛋麵啦。

放假想帶妹豬去食個ALL DAY BREAKFAST顯示下咩叫生活態度，唔係話唔得嘅，不過個餐得返一半囉。

打完波，想同班兄弟去整返個熱狗…… 但腸仔致癌喎，食齋包加醬啦，但其實咁多醬料都好高鈉，唔健康，算啦都係乜都唔好食喇。

淨係諗到呢度，毛毛已經覺得世！界！末！日！喇！！！

不過世界末日又點呀，腸仔火腿可以唔食，工還是要返的。唔講住喇，腦細又點我幫佢嗌外賣喇，幫佢嗌個火腿通好唔好呢…… 

封面圖片來源：sina