香港地商機處處，只要你有少少能力同肯用少少勞力，要賺錢其實唔難（好似係）。好似攝影師呢啲咁專業嘅人才，照計冇理由會搵唔到飯食㗎？睇返，原來唔淨係得我哋噚日搵到嘅攝影師Deric畀港媽搲過，仲有其他攝影師都經歷過㗎。噚晚又有另一個攝師師喺fb post咗同港媽嘅對話出嚟。不過，睇完出盡奶力為攝影師鋪條生意路嘅港媽，同出盡奶力推走生意嘅攝影師，我終於明白點解啲攝影師搵唔到飯食喇。嗱，等呢個港媽教精你哋啦，做生意是咁做的：

1. 強大後盾  

要做到生意、贏到大錢，首先你要有強大嘅後盾。就好似呢個港媽咁，一呼45應，不費吹灰之力就可以得到45個like，好過啲攝影師孭住咁重架撐走嚟走去擒高擒低再絞盡腦汁諗角度校光暗調zoom遠近先影得一張呃like嘅相。古乳講得堅係冇錯，識人好過識字呀！

2. 做好預算

做生意嚟講，筆直好重要，如果你冇筆直，就等同掟錢落海一樣，無底深潭嚟呀！所以港媽就叻豬喇，計好晒條數，多除少補，知道場租貴，咪喺第二啲地方慳啲囉！

3. 放長雙眼

做人，特別做生意，目光一定要遠大啲。放長線，釣大魚吖嘛，唔好淨係睇眼前，今日你儲落一個客仔，儲下儲下他日就成大器㗎喇。學港媽話齋，免費影一次相，就儲到45個客仔，而呢45個客仔，每個都又有佢哋各自45+個朋友仔，嘩，呢條財路，我唔識計喇！

4. 抓緊機會

唔好成日淨係喺度概歎這些機會不是屬於你的，有啲機會係要自己爭取自己把握㗎。

5. 厚面皮

不過，最重要嘅條件其實都係面皮要夠厚，關於呢點，港媽直情瞓晒身咁做咗個真人示範，唔使我多講。但可惜阿港媽打咗咁多字，苦口婆心咁免費傳授咗咁多「做生意是咁做的」嘅心得畀攝影師，呢個攝影師一個錢都袋唔穩，又難怪港媽最後嬲豬嘅⋯⋯

封面圖片及來源：Marcobilly Chong

延伸閱讀：【攝影師唔使食飯㗎】港媽FB share相當報酬