近幾日葵涌廣場頂樓電梯口間平靚正芒椰奶西執咗呀！對我哋呢啲窮L廢青嚟講簡直係天大嘅惡耗！

毛毛飲咗十幾年喇，而家因為加租做唔住就執咗，十蚊有找又咁好味仲要冇肚痛嘅嘢飲，去邊度搵呀！嗚嗚嗚…… 毛毛一直都只係窮L，由中一開始到出咗嚟做嘢，都淨係識行啲商埸仔，好似葵涌廣場同旺角中心咁，真係好多青春回憶㗎～下面啲幾樣嘢，有行過葵廣同旺中嘅你，一定懂的！

強勁節拍

間間舖頭都播唔同歌，中日韓歐美歌都有，總之呢期興《It’s not my name》就播《It’s not my name》，興《江南style》就播《江南style》，或者明明唔興好耐，都仲播《老鼠愛大米》。

旺中頂樓撈撈叔

頂樓轉角位有個大叔老闆，以王小虎超長的水+背心造型，一邊撈冷麵一邊跟隨住附近時裝店播歌嘅強勁節拍，瘋狂奀身奀勢，話唔定佢嘅座右銘係：「哥撈的不是冷麵，哥撈的是搖滾」！

旺中vs新之城

雖然旺中同新倒轉e城係連埋一齊，但同一件衫分分鐘差成百蚊，所以作為窮L，識行一定係行旺中！

氹氹轉，蕩失路

葵廣有兩邊都有扶手電梯，而中間幾條巷嘅衫舖又間間都差唔多樣，如果想去返之前睇啱嗰間買嘢，分分鐘有排先搵得返！

試身室樂園

葵廣同旺中嘅舖頭都係細舖仔，九成九都冇試身室，所以買完件衫，唯有立馬去廁所笠一笠，唔啱就即刻拎返去換。唔怪得之毛毛要喺廁所門口等娘娘等咁耐啦唉……

歡迎埋嚟試雪糕～～～

如果你冇聽過「埋嚟試下味呀～歡迎試雪糕～」呢句說話，就唔好話你有上過葵廣頂樓！只要有聽過，就一定會畀雪糕姨姨/妹妹迷人嘅聲線同起伏有致嘅旋律洗腦。

封面圖片來源：blog.leprabelle、backpackers.com.tw、蘋果日報

資料來源：蘋果日報