陪咗我哋12年嘅台灣綜藝節目《康熙來了》終於都要講byebye喇，個個都好關心到底最後一集嘉賓會係邊個。

當大家仲估估下嘅時候，有啲人就巧威威咁即刻喺微博貼相，自爆話自己收到《康熙》嘅邀請，將會成為最終回嘅嘉賓喎。

之不過噚日蔡康永就喺個訪問度講返，《康熙來了》最後一集只會係得佢同小S兩個，唔會有其他來賓呀！嗚哇喊出嚟！

原來本身《康熙》製作人係真係諗住請夠一百幾廿人嚟參加嘅，但係小S就覺得既然係最後一集，好應該剩係屬於佢哋兩個，唔需要再請啲咩嘉賓喇。哎呀，等毛毛仲滿心期待，可以睇到阿政協委員點7……吖唔係，係點樣同小S鬥嘴?！不過講真，毛毛相信好多人都同我一樣，嘉賓係邊個其實真係唔重要，最後一集都只係想睇蔡康永同小S兩個人嘅互動，好好咁留返一個回憶畀自己，咁就夠喇。

封面圖片來源：wow.qoozai/華商報

資料來源：華商報

延伸閱讀：康熙來了壓軸嘉賓竟然係......