香港體育到底發生咗啲咩嘢事？點解一瞓醒，個個運動員都爭住攞獎？搞到人全身都濕晒囉！毛毛保證你哋睇到呢一個月嚟啲運動員有幾努力，都會同毛毛一樣感動到想即刻落場揮灑汗水！
1.亞運銅牌得主張敬樂
舊年拎到亞運銅牌嘅張敬樂，喺10月31號去咗哥倫比亞參加世界盃場地單車賽，成功喺30公里記分賽奪冠！無錯！係冠軍呀！
2.牛下女車神李慧詩
同樣出戰哥倫比亞世界盃場地單車賽嘅單車女神李慧詩，喺10月31號到11月1號連續兩日比賽，喺奧運爭先賽拎季軍！再喺女子凱林賽拎第五！順利為之後嘅奧運鋪路。點解女神可以咁勇㗎？！
3.男女子七人欖球代表隊
欖球喺香港雖然唔係熱門運動，但香港隊無放棄自己！喺11月8日亞洲七人欖球外圍賽，男子隊屈居亞軍，不過留意返，佢哋嘅對手係勁到所向無敵手嘅日本隊喎！喺咁嘅情況之下仲要一度領先，順利喺成日屈人食零蛋嘅日本手下得分！而女子組都唔輸蝕，打低咗中國隊攞到季軍！
4.港隊足球代表隊
足球港隊神勇已經人人都知！佢哋今個月同馬爾代夫死鬥，成功全取三分，然後今個月17號好好好犀利咁打平強國隊！而家喺排行榜排第二，依然有出線希望！
5.香港板球隊
同欖球差唔多，板球喺香港唔算盛行，不過一班運動員一直堅持呢項歷史悠久嘅運動。前日即係18號，喺世界板球冠軍聯賽贏到開巷，四場贏足三場，總分拋離咗其他國家一大截，而家坐喺榜首！
6.桌球代表傅家俊
講到體壇名人自然唔少得神奇小子傅家俊，佢噚晚(11月19)喺名將盃打入咗四強。希望佢可以好好發揮，喺21號挑戰冠軍賽啦！
7.羽毛球新星伍家朗
超級丹就好似個不敗神話，但呢個神話啱啱俾得21歲嘅伍家朗喺香港羽毛球公開錦標賽破咗啦！19號成功贏咗林丹呢個最大對手，晉身8強。香港大嘅佢證明咗只要出盡全力，就算係再強大嘅對手都唔使怕！
8.乒乓新秀朱成竹
唔止呢班已經擔正旗嘅選手喺度努力，一啲後起之秀都隨時準備好接前輩班。就好似青年乒乓球代表朱成竹，喺19號嘅葡萄牙青少年公開賽贏完女單，再贏女雙！攞晒兩塊金牌！
9.保齡球健將胡兆康
胡兆康仲勁！喺19號嘅QubicaAMF保齡球世界賽第一次拎到冠軍，同時成為咗香港第一個保齡球世界級冠軍，開創咗香港體壇新一頁！
有人曾經講過，體育對香港係無經濟貢獻嘅。毛毛就唔清楚搞體育有無錢賺啦，但香港運動員個個都咁勁揪，搞到全香港都好興奮！肯肯定對香港嘅士氣好有貢獻囉！
封面圖片來源：成報, quibica amf
