雖然毛毛有好多優點，但多數啲人都淨係見到毛毛嘅缺點而睇唔到我啲優點，因為我嘅缺點就係唔夠靚仔囉......但原來唔靚仔、甚至樣衰都可以係優點！可惜識欣賞人醜嘅地方離香港好遠好遠，係一個叫津巴布韋嘅地方......

喺上個星期五，津巴布韋嘅首都哈拉雷就舉行咗第四屆嘅醜男選舉，上得台嘅全部都畀人話係天然醜、無加工。啲參賽者為咗突顯自己夠醜，刻意着爛衫、戴晒最無taste嘅首飾，而冠軍憑著一口爛牙順利勝出，拎到相當於嗰邊10個月人工，即係$500美金嘅獎金呀！

聽講個主辦人係想多啲人識得欣賞醜嘅美喎，仲希望可以推廣呢個文化去世界各地......btw，幾時先到香港搞呢個選舉呀？個樣唔夠樣衰、打扮得唔夠頹嘅話都係贏唔到㗎喎，毛毛都係準備定我件戰衣先～

封面圖片及資料來源：dailymail