雖然小鳳姐好忙咁慶祝緊Tree Gun榮休區議員，可惜鼠王芬竟然仲大大隻喺度，不過都好多謝另一位候選人滅鼠嘅努力，於是毛毛搵咗女神真. 游蕙禎做咗個訪問。

毛：蕙禎BB你真係好勇呀，由一個普通OL去參選同一個殺咁多生嘅鼠王鬥，其實係咪付出咗好多呀？

游：首先我成個星期冇乜點瞓而家好眼瞓啦，同埋我辭咗份工，呢場選戰係用自己啲積蓄去打嘅.....

毛：哎去驗眼啦班街坊！咁你之後打算點呀？

游：我會繼續做地區工作，冇咗個議席但係我仲可以做到嘢嘅，我唔想放棄信任我嗰二千幾個街坊。

毛：黃埔班街坊真係幸福，不過有人話今次係出術喎，有網民話重新點票冇啦啦多咗300票出嚟，係咪有啲咁嘅事呀？

游：冇，冇重新點票，啲問題選票其實都得廿幾張啫，雖然有張係吸咗十幾個印喺梁美芬個樣度都計落去，我覺得爭300票都冇唔公平嘅。

毛：有嗰句講嗰句，果然係女神。不過毛毛都諗唔明鼠王芬有乜理由會唔輸㗎！

游：始終動員能力係差啲，好似佢哋有班街坊嘅電話number啦，話畀佢哋知告急呀要嚟投票呀咁，呢樣嘢我哋都未做到住。

毛：係喇，你唔係住嗰頭㗎喎，點解你會去選黃埔東嘅？

游：因為呢一區好香港，畀人感覺得我真係身處喺香港呀嘅感覺，即係香港六十至八十年代嗰班人捱咗大半世，好唔容易儲咗一筆錢搬咗入去一個理想嘅居所，呢個地方好似象徵咗香港最美好嘅嘢，但係隨著呢幾年越來越多藥房金舖自由行去侵蝕呢個社區，我想可以保留返呢度原來嘅風景，所以就想起區議會呢樣嘢。

毛：唉，其實你輸咗毛毛就好想喊喇，咁你有冇唔開心呀？

游：本身就冇好想喊，但係知道結果之後有個朋友喺點票站同我講：「你睇下吖，入面有二千幾個人支持你㗎！」嗰下真係......

毛：如果毛毛住喺黃埔東，我一定係二千個入面嘅其中一個！我信嗰二千幾個街坊唔會後悔，佢哋會見到你嘅努力㗎！

加油呀蕙禎bb，我諗毛毛同埋好多精神上支持票都信相你咁有熱誠日後一定會有更好嘅成績㗎！

ps. 下期《100毛》仲會有更詳細嘅剖白呀！