吱吱，噚日就同大家講過文仔哥哥而家點呀，唔知另一隻老鼠仔子健哥哥嘅近況又點呢，吱吱？

由兒童節目主持到財務策劃師

子健哥哥而家已經冇拍劇喇，做緊財務策劃師，而且2013年開始喺University of Newcastle修讀DBA，希望出年年尾或者2017年頭可以畢業。點解會有咁大轉變嘅？佢話因為覺得唔同階段應該做唔同嘅事，年級仲細嘅時候做兒童節目梗係好玩啦，大個咗，就應該有進步，所以進修之後就開始做財務策劃師喇。子健哥哥出年仲會演出藝進同學會嘅舞台劇《才子亂點俏佳人》，咦估唔到佢扮花旦又幾嬌俏喎...hehe~

譚玉瑛姐姐成日鬧人？！

問到子健哥哥以前做兒童節目有咩難忘回憶，佢話最記得自己雖然做《閃電傳真機》之前做過一年路人甲乙丙，但對娛樂圈嚟講都仲係新人，所以拍嘢嘅時候好緊張，仲成日畀譚玉瑛姐姐鬧佢哋幾個主持亂七八糟呀！不過佢話其實譚玉瑛姐姐係前輩，做嘢認真，先至會對佢哋有要求。佢哋私底下都好friend，成日見面嘅，當年做《閃電傳真機》，見班主持仲多過見屋企人呀！

以前嘅兒童節目vs而家嘅兒童節目

子健哥哥話以前嘅兒童節目內容好豐富，通常會拍2日廠景加5日外景，成日出去問下小朋友問題，介紹下香港嘅郊野公園、博物館同名勝咁。大人細路又會為每年嘅《兒歌金曲頒獎典禮》撲飛，《12隻恐龍去野餐》、《長腿叔叔》，首首都係經曲作品，但而家呢？你有幾可聽到小朋友唱兒歌呀？

子健哥哥仲話好記得喺朋友facebook見到一句說話：「小朋友返到屋企睇兒童節目仲要學英文」，覺得講得好啱，而家嘅兒童節目比較著重功能性，少咗啲娛樂嘅作用同童真。以前佢哋做節目，就會由小朋友角度出發，「玩」嘅意味同樂趣多好多。

有咩想同長大咗嘅小朋友講呀？　

當年睇《閃電傳真機》嘅小朋友（包括毛毛）而家都大個仔大個女喇，子健哥哥有咩想同大家講呢？佢話社會上好多人都話八九十後點差點唔好，但佢就認為唔係幾多十後嘅問題，而係每個年代都會有人覺得一代不如一代，最緊要大家為香港同屋企努力，發熱發光發亮，就可以做到改變。大家加油呀！