Vikki姐姐好耐冇見喇，毛毛都係聽長腿叔叔你好嗎大㗎，毛毛搵咗好奇鼠唐韋琪Vikki姐姐問吓佢而家點呀～

Vikki姐姐呀，你而家做緊咩呀？

Vikki姐姐本身係流行歌手，因為唱咗《長腿叔叔》呢首走咗入兒童節目嘅世界，一做就十幾年喇，95年做到07年 ，由《閃電傳真機》《至net小人類》做到《放學ICU》。Vikki姐姐嘅夢想係開一間教才藝嘅學校，而家嘅佢係才藝訓練中心校長同導師，教小朋友唱歌跳舞畫畫，依然係每日都同小朋友一齊呀。

點解咁鍾意做兒童節目？

佢話兒童節目好好玩，有得同譚玉瑛姐姐做節目好興奮，因為佢同毛毛一樣都係睇譚玉瑛姐姐大㗎！Vikki姐姐本身好鍾意扮鬼扮馬，現實生活入面如果咁貪玩鬼馬，喺大人世界會畀人覺得好怪，但係入到兒童節目可以奉旨去做返個細路。佢仲話就算性格幾cool嘅人入到兒童節目都會慢慢好似融化，真好好似一班哥哥姐姐咁，成個世界單純啲。

覺唔覺得而家啲細路冇晒童真？

Vikki姐姐唔覺得呢個年代啲小朋友冇晒童真，佢話其實小朋友有冇童真係好睇大人畀到佢咩感覺，覺得小朋友冇童真嗰啲父母可能係自己比較少時間同小朋友相處，將小朋友交晒畀工人姐姐湊，先會見唔到佢哋童真嘅一面呀，反而啲大人應該用多啲時間同用心同小朋友相處同溝通呀。

做人最緊要要保持童心！

Vikki姐姐話，每一個人大個咗出嚟做嘢，日日不停做呀做呀，會距離童真越來越遠，忘記咗本來有嘅趣味，或者自己鍾意嘅嘢。要記得保持童心，如果睇人可以睇卡通片咁睇，唔好咁複雜，咁樣個世界都會純真啲同有樂趣啲喇。

唔知點解同Vikki姐姐傾完計，成個人好似後生咗十年咁呀，雖然毛毛智商本來都係得五歲，吱吱。