毛毛今日搵咗Simon哥哥魯文傑傾計呀！唔怕細細聲同你講吖，毛毛細細個就覺得Simon哥哥好靚仔㗎，sh......

好耐冇見喇Simon哥哥，你而家點呀？

Simon哥哥做咗五年《閃電傳真機》，喺《芝士學堂》入面叫做郵差鼠，冇喺大台拍劇之後，而家做轉做話劇同埋教人做戲，今年萬聖節仲做咗海洋公園哈囉喂演員導演?。而家已經係兩歲囝囝嘅爸爸喇。

做兒童節目主持 由唔鍾意做到唔捨得

Simon哥哥做《閃電傳真機》嗰時仲係演藝學院嘅學生，當初唔係話特別鍾意做兒童節目，都係當打份工有錢就做。佢話當時好抗距做《愛登士家庭》入面掃把頭白面紅唇膏嗰個角色，不過做兒童節目冇得怕醜所以頂硬上，點知最後最鍾意最唔捨得就係呢個角色。Simon哥哥話有人會覺得做兒童節目好低能，但係咩係低能先，自己鍾意咪得囉，做人邊度理得嚟咁多人點睇啫。

大台20年做到冇癮 轉去港視又唔發牌

做咗5年兒童節目之後，Simon哥哥又畀大台調咗去劇組，不過做嘅角色來來去去都冇乜發揮空間，話得做到無晒癮呀！於是Simon哥哥2012年離開咗大台去HKTV發展，佢話wiki畀佢嘅條件唔錯，仲係一個好好嘅平台，畀到佢想做嘅角色，Simon哥哥話「點知689搞鑊咁嘅嘢」，HKTV冇牌，本身已經接到劇本嘅劇都冇得拍，真係好可惜呀。

而家啲細路好辛苦 唔恨名校最緊要有創意

而家已經做咗爸爸嘅Simon哥哥話會永遠當自己係小朋友咁同仔仔相處，唔使吓吓敦起個大人款㗎。佢仲話好怕而家啲怪獸家長，搞到而家啲細路好辛苦，以後嘅兒童世界冇而家咁複雜，啲小朋友仲開心啲。佢覺得名唔名校有乜所謂喎，係讀到書就自然會讀到㗎啦。佢覺得成績唔係最重要，最緊要係小朋友有創意同想像力呀，做你仔仔一定好開心啫，吱吱！



無論係兒童節目定係劇集，毛毛好想睇你做戲呀！一日最衰都係正苦阻住晒，唔知因為咁白白浪費咗幾多有heart嘅演員呀唉。