高比拜仁，曾經五次奪得NBA總冠軍，2次MVP（最有價值球員），NBA得分榜排第三，總積分有成32,670。呢個男人，可能係最接近神嘅男人。遲啲再睇唔到佢落場，而家不如就J住佢嘅十大精彩入球先啦！

97年入樽賽冠軍

97年嘅入樽賽，高比拜仁以一招跨下入樽拎咗冠軍，當年佢只得19歲。

個人全場入咗81分

2006年1月26日，湖人以122分嬴咗得104分嘅速龍，高比拜仁自己一個就入咗81分。

加時一刻追嬴對手

06年季後賽，湖人對太陽，高比喺最尾階段幫隊波追分追到加時，仲喺加時期間最後一擊反勝對手。

In your face 候活

In your face其實係英文入面係有羞辱人嘅意思，即係無視你硬入你樽。當時啱啱出道嘅候活就畀高比in your face喇。

2008年奧運美國對西班牙

靠高比喺關鍵時刻（1:57)三加一（即係三分再foul court），幫美國隊拉開比數，最後仲嬴埋冠軍。

最後3秒入波反勝熱火

09年對熱火，本身落後緊兩分，得返3.2秒嘅時候高比喺中場開波，失平衡之下撞籃板射入三分反勝。

2010年拎第五隻冠軍指環

每嬴咗NBA季後賽一次，就會得到一隻冠軍指環。2010年，湖人喺季後賽擊敗賽爾特人，高比拎到佢第五隻嘅冠軍指環。

喺勒邦占士面前雙手入樽

2011年明星賽，喺同樣球星嘅勒邦占士面前雙手入樽，震驚全球13億人。

犯規都入到波

2014年常規賽對勇士，高比一個失平衡上籃，犯咗規但係都入到波，仲搏多個罰球返嚟。

總得分超越米高佐敦嘅一刻

2014年對木狼嘅常規賽，高比憑住罰球總得分 32,293 分，喺排行榜上面超越咗米高佐敦，成為第三名，而米高佐敦就屈居第四。

你可能唔鍾意高比，但不得不承認嘅係，佢打波，真係好！L！勁！唉，睇完啲片，又更加唔捨得佢喇......

封面圖片來源：sportsworldreport

資料來源：毛毛自己個腦