噚日陳仲翔帶埋自己嗰個讀緊油蔴地天主教小學（海泓道）四年級嘅女一齊去立法會公聽會，親身話畀人知原來考TSA都可以咁好玩咁輕鬆，仲話佢識嘅家長入面，冇一個人想取消TSA喎。將TSA講到咁好，搞到毛毛都想考埋一份呀！點知今日油天小學就發聲明，話某啲家長嘅言論唔代表學校嘅立場，實行劃清界線咁樣樣喎。

除咗發聲明之外，學校仲公佈咗一個關於家長對於應唔應該取消TSA嘅意見調查結果：

嘩，過半數家長都話想取消TSA，而想繼續keep住有TSA嘅得19%咋！喂呀你哋唔好咁誠實啦，你哋講晒啲真話出嚟，叫人哋情何以堪喎！人哋噚日先話佢識嘅家長入面，冇一個想取消TSA㗎（0:50開始）！

唉，可能人哋剩係識嗰19%嘅家長，唔識嗰52%嘅少數派家長呢！你哋識條鐵咩！btw，唔知佢睇完個調查結果之後，會唔會又寫返篇稿叫個女發表下意見呢？

封面圖片來源：RTHK/油蔴地天主教小學（海泓道）

資料來源：油蔴地天主教小學（海泓道） 、調查結果