祖堯BB好受中大同學歡迎㗎，佢個blog一有新嘢，就會有大把人留意～噚日佢就出咗篇《尊嚴和尊重》嘅文，點知啲同學仔話like唔落呀！

事緣呢篇嘢係講佢同同學一齊睇港中大戰，見啲同學噓強國國歌，佢覺得咁樣好唔應該、好唔尊重自己嘅國家！仲話好不安、好痛心呀！最後為咗打動同學，佢仲引述咗創立新亞書院嘅錢穆先生嘅贈言：「你是中國人，不要忘記了中國！」

話說新亞係中大裡面其中一間書院，當初成立嘅目的就係為咗傳承中國文化，所以錢穆咪成日提住啲學生要記掛中國囉！不過呢、不過呢～「中國」唔一定代表「中華人民共和國」嘅，於是新亞學生會就開聲問校長喇......

唔、唔，原來錢穆首先落嚟香港避風頭，之後又去咗台灣～咁睇嘅話，個「中國」好可能係「中華民國」喎～不過我哋又唔係錢穆肚裡面條蟲，鬼知佢諗咩吖？點知有疑似墳場職員嘅同學召喚錢穆，等佢自己出嚟解畫！

睇嚟祖堯真係搞錯咗錢穆嘅「中國」喎～Btw，祖堯咁樣算唔算二次創作咗錢穆對「中國」嘅定義呀？

封面圖片來源：蘋果日報
資料來源：香港中文大學 校長網誌,新亞學生會 NASU,CUHK secrets