呢班見證住香港電視行業誕生嘅真. 80後演員（90後都有），唔少已經做咗戲大半個世紀，香港人第一次睇公仔箱就係睇佢哋喇！
侯煥玲（92歲）
唔叫得出名都一定認得佢個樣，人稱「周星馳御用阿婆」嘅佢叫做侯煥玲呀！喺《喜劇之王》做勁?林子善嘅阿嫲，睇完佢都突然間想孝順自己阿嫲呀！
周驄（84歲）
周驄個樣真係好慈祥好親切，毛毛真係好鍾意睇佢做戲，記得佢喺《溏心風暴》做嘅善良爺爺睇到我流晒馬尿，毛毛每次見到佢都仲會大叫：係爺爺呀！
李香琴（83歲）
琴姐16歲就開始做大戲，之後又拍過好多電影同劇集，做咗戲足足六十幾年呀！佢喺《溏心風暴之家好月圓》入面嗰句「唔使驚，嫲嫲喺大廳！」令佢嫲嫲嘅形象深入民心，琴姐今年中患咗腦退化症，嫲嫲要小心身體呀。
胡楓（83歲）
胡楓真名係胡繼修所以叫做修哥。修哥真係好勁，唔知係唔係因為跳得舞多，成80幾歲人依然好健康好活躍，原來佢都成83歲都仲未退休，修哥真係好可愛～ 都係嗰句啦，大家記得揸緊扶手呀！
梁舜燕（82歲）
梁舜燕出名除咗有太后同埋唐太宗活絡油 ，原來佢14歲便做話劇主角，仲係香港電視史上首位女演員，演出咗成差唔多七十年喇，到而家仲拍緊新劇，真係好強呀！
羅蘭（81歲）
龍婆羅蘭唔止係問米婆之中嘅經典，仲憑《爆裂刑警》嘅四婆攞過電影金像獎最佳女主角㗎！到到而家都仲係MV廣告電影電視乜都齊，仲勤力過毛毛呀！
許碧姬（下個月80歲）
仲有仲有呢位大台超級御用阿婆許碧姬，真係乜嘢包租婆無牙婆垃圾婆乜婆都畀佢演過晒，老是常出現嘅佢分分鐘拍過嘅戲仲多過一二線明星呀，佢下個月就80大壽喇，等毛毛講定聲恭喜賀喜先！
多謝你哋大半世人對香港電影電視嘅貢獻，毛毛祝你哋健健康康，拍多啲好戲！
來源：《喜劇之王》電影截圖、sogou.com、blogspot.hk、ddchoicebb、m.life.com.tw、sina.com、林巴黎Paris
