2015年12月09日 星期三
【世界大戰抹黑宇宙了】雪糕優惠fail 網民留言插爆
聽講噚日有甜品店做緊雪糕買一送一優惠，原價要成$40幾蚊個，貴嘢嚟㗎！做咗優惠之後即係平咗廿幾蚊咁多多，嘩抵咗好多呀真係！可惜毛毛一支公，搵唔到人同我些牙，所以最後都冇去到囉。點知原來好似全香港人都去咗排隊喎！
嘩，唔講毛毛仲以為年宵提早咗開始呀！聽講高峰時段條人龍仲試過由九龍塘排到上深圳?！估唔到一個優惠就可以令到香港人咁團結，計我話奶媽仲使乜搞啲咩欣賞香港嘅活動吖，間雪糕店日日做優惠咪得囉！之不過間雪糕店實在太睇小香港人對雪糕嘅渴求喇，啲雪糕原來係限量供應嘅，仲要提早截龍，搞到返office工嘅人食唔到囉！哎呀，好多人成世都未食過雪糕㗎嘛（好似係），食唔到雪糕，結果咪搞到個個喺甜品店個facebook度留言插爆囉：
不過有班網民就唔係咁睇喇，佢哋覺得為咗廿幾蚊而排到2046根本就唔值得！喂，邊個話因為貪平先去買雪糕啫，係對食嘅一份執著呀！你哋識條鐵咩！
唉，毛毛食花生都食到飽晒，唔使食雪糕喇。Btw，今晚金鐘都好似有雪糕派，肯肯定唔會截龍，仲無限量供應，唔知會唔會都有咁多人去呢下？
封面圖片來源：Godiva Chocolatier (Asia)
