呢幾日都落雨陰陰寒，要著到成隻糭咁已經夠煩㗎啦，仲要擔住把遮，不如一槍打死我啦……

今日都唔係好大雨啫，不過大埔竟然都浸到好似成條黃河搬咗過嚟咁呀！你睇下太平工業大厦對面條隧道，浸到行唔到喇！

你可能心諗，隧道浸就實㗎喇，但係你再睇埋先啦，連地面都有條河囉！不過聽講唔係淨係因為落大雨先搞成咁嘅，係因為過多雨水引致爆鹹水管，加埋渠道淤塞，咪搞到要召喚馬仔囉。

之前七月有次黃雨，港島點知黃河呀，直頭激流呀！啲人成日話香港係國際大都會呀好先進好文明呀乜乜乜呀，但係一場雨啫，就咁嘅款，其實正苦睇唔睇到㗎？啲官有冇真係理過民生㗎？喂喂？收唔收到？

唉，連黃雨都冇呀，咁就水浸，畀馬仔抖下得唔得？

封面圖片來源：鄭嘉榮‎/Tai Po 大埔

資料來源：Richard Scotford