就嚟聖誕節喇，真係未放假先興奮，打工仔得兩日假都一早plan定要BBQ飲嘢睇戲直落玩盡佢啦，學生哥有成半個月咁耐咪仲high？

之前有間中學出通告話唔畀F.1仔用WhatsApp約同學出街街，搞到同學們要傳紙仔或者飛鴿傳書嚟約（聽講），勁唔環保囉。

今日就畀毛毛發現，原來呢間世界級學校，連啲學生喺聖誕假有冇出街玩都會「照顧」埋㗎！佢話就算家長畀仔女出去玩，學校都會勁擔心喎，真係教者父母心喇。唔好沉迷打機或者去蒲，毛毛都明呀，但後生細仔唔好去郊野或者海灘，毛毛真係理解唔到。唔通想上大東山影下芒草都會識到壞人嘅？

呢個世界咁危險（學校講到），咁學生應該點做好呢？哦，原來講到尾都係想班細路最好唔好出街，乖乖地留喺屋企咪書……其實聖誕假都唔係好長啫，咁都荒廢到學業都算係奇蹟囉～

雖然啲校規係嚴啲，不過學校都係一片苦心，for your own good啫阿仔，毛毛作為好孩子，一早幫學生哥plan好聖誕假時間表㗎喇……就係日日溫書溫書溫書溫書溫書溫書……

封面圖片、資料來源：劉永生中學

延伸閱讀：【咁嘅校規都有】中學生Whatsapp約去街都唔畀？