2015年12月14日 星期一
【你講晒啦】林旭華撐網絡23條 原來以前拍過片反對？
噚日香港版權大聯盟搞咗個撐網絡23條嘅記者會，打晒交咁，仲搞到修哥同羅蘭姐畀人困住咗喺會場，真係陰公豬咯！你睇下修哥個樣幾慘？
點解佢哋走唔到？咪就係因為版權大聯盟拒絕畀網媒入場，於是班網媒就索性塞住個出口，實行你唔畀我入時我都唔畀你出咁囉！版權大聯盟發言人林旭華後來接受記者訪問時就話，覺得自己嘅言論自由受到威脅，所以決定臨時取消記者會！
少年你太年輕了。人哋死都唔肯畀你入會場就梗係有原因㗎啦！驚你哋爆佢大鑊呀！原來林旭華身為撐網絡23條嘅頭號支持者，喺2011年嗰陣曾經拍過片反對版權條例㗎！
當時仲係好pure好true嘅佢話，從來都未聽過有人會話二次創作惡搞會侵犯創作人嘅權益，仲話細細個學寫copybook都係由參考人哋啲字嚟慢慢學習，最後仲話正苦唔知搞乜，呢樣又要禁嗰樣又要禁，都唔知急啲乜嘢咁樣樣喎。唉，估唔到人嘅嘢真係話變就變，搞到毛毛都好想唱返首：「變幻，原是永恆……」牆頭草呢啲嘢，我真係識條毛咩！
封面圖片來源：HK OurTV
