街邊馬路邊就話行幾步就有個流局長坐陣啫，去到山旮旯，流局長邊分到身喎，想做死佢咩。山高局長軟遠呀，所以好多時啲人親親大自然嘅時候咪偷偷地亂掉垃圾囉。

毛毛有時放假都會去下效外影靚相嘅，但見到南生圍多垃圾到咁樣樣，仲點小清新呀。

最近呢就有班有心人，自發去到南生圍執垃圾，佢哋7個人，用3個鐘頭行咗100米，就已經執到12大袋垃圾喇！100米，10幾秒都跑完啦，咁短嘅路程已經執到咁多垃圾，It’s so crazy！大家想以後仲有咁靚嘅地方影相，就自己垃圾自己掉，唔應該等人執手尾囉。

南生圍就有好心人執垃圾呀，但西貢蚺蛇灣就冇咁好彩喇。個山就綠油油成個瑞士山區肺咁feel呀，但其實下面成個沙灘都係海度飄上嚟嘅垃圾，膠樽又有，飯盒又有…… 真係隔住個mon又覺得臭。

之前西貢白臘仔沙灘有人發現有隻死咗嘅綠海龜成個肚都係膠袋同尼龍繩呢啲海洋垃圾……郊野就一地都係垃圾，海龜就一肚都係垃圾，香港人係咪要香港真係變臭港先識醒呀？

封面圖片、資料來源：潘文、Jel Lam

延伸閱讀：【成肚海洋垃圾】西貢綠海龜慘死