點解啲漫畫家可以有咁多靈感，一套作品一畫就畫十幾廿年㗎？有啲簡直係史詩式大作，內容豐富到畫足廿年，睇極都唔夠～不過有啲就好有衝動同佢講「拖夠未呀！？」！

海賊王ONE PIECE(1997) 尾田榮一郎

雖然重睇幾多次都係咁好睇，但已經18年喇，到今日都未知佢哋搵緊嘅one piece到底係咩～好想快啲知，又唔想佢哋咁快搵到。

全職獵人HUNTER X HUNTER(1998) 冨樫義博

富樫出名頹、出名hea，海賊王已經突破800期，Hunter仲係第349期咋！仲有咩好講呀？等到命都無喇！

死神BLEACH (2001) 久保帶人

前幾年拖戲拖到一班fans都忍唔住放棄佢，最近總算有返啲正題喇(好似係)～不過再悶都好，至少可以當水墨畫睇呀～好藝術㗎！

D-gray man (2004) 星野桂

雖然無上面嘅作品咁紅，但曾經係大熱門嚟～就喺佢最hit嘅時候，作者病咗啵......到佢病返好，就轉咗去畫月刊，而家仲變埋做季刊......2046都唔會完。

網球王子 (1999) 許斐剛

中學嗰陣好多女同學鍾意睇㗎～套嘢有成過百個一啲都唔似中學生嘅靚仔，佢哋由日本打到去美國，仲用埋超能力，毛毛相信佢哋有朝一日可以打到上宇宙?！

柯南 (1994) 青山剛昌

你明唔明呀！柯南好慘㗎，做咗21年小學生喇！就算唔搵解藥都夠時間長大，結婚生仔都得啦！一諗到呢點，毛毛就覺得柯南比自己仲淒涼......細路係無資格上This咩咩㗎嘛！

金田一少年事件簿(1992) 金成陽三郎、天樹征丸

金田一同柯南聯手，廿年裡面害死咗上千個人喇！好心佢哋就唔好再出嚟行，等日本有啲安穩日子過啦！雖然毛毛仲係會睇......

JOJO的奇妙冒險(1987)  荒木飛呂彥

唔經唔覺，JOJO已經去到第8部喇！由美國去咗日本，故事仲變咗做唔知咩平行世界?！唯一無變嘅，就係啲畫依然勁有特色，同作者都係無老過......毛毛擔心自己睇唔到佢畫完，多過佢畫唔完呀！

五星物語(1986) 永野護

唔知有幾多香港人睇過啦～但作者永野護，設計過高達裡面嘅機械人㗎！佢呢套作品同高達一樣咁長命，一樣瘋狂出歷史設定......畫到成本史書咁，好難唔擔心畫唔完喎。

毛毛而家真係好驚，日日返完工都得返半條人命，都唔知有無咁長命可以追到結局呀！嗚嗚......唔通要叫定啲子子孫孫第時燒畀我？

封面圖片來源：4gamers、one piece-wikia、van698、ckworks、wayi