講起沙田市中心，一定會諗起一大埋紅色嘅建築物，新城市、酒店、圖書館、婚姻註冊處同大會堂都係紅磚外牆，配埋城門河邊同中央公園嘅植物，望落真係好舒服㗎。

不過呢，回憶的堡壘，剎那已倒下，沙田大會堂喺舊年12月開始外牆更換工程，今個月完工喇，嘩，真係新到認唔出呀，由好warm好有文化氣息嘅紅色變咗灰白色。55，睇見都灰9。毛毛仲以為寶福山咁好生意，要擴展業務到市中心呢邊呀。

新城市嘅噴水池唔見咗，開咗廿年嘅M記執咗，西田改名做一田，而家開晒間間都係名店，愈嚟愈陌生。毛毛只想弱弱問一句：我由細識到大個沙田，去咗邊？

噴水池

噴水池真係（以前嘅）新城市最大地標！一邊等人一邊睇噴水表演，都不知幾開心，而家就唔得喇，唔通一邊等一邊同啲7到爆嘅商場公仔自拍咩？

龍城

毛毛讀中學嗰陣成日都放學去好運逛返個圈㗎，雖然乜零用錢，不過去龍城望下啲漫畫封面已經好滿足。

食唔返嘅味道

超人餐廳、東東雲吞麵、哈迪斯，甚至新城市5樓嘅M記都同我哋講咗byebye，而家就得返啲排極都冇位嘅貴價餐廳。連曾經係全球交易量最高分店之一嘅M記都做唔住，想一家大細去新城市食餐飯，好似難啲喇。

西田

沙田人嚟講呢，識叫一定係叫西田，而唔係叫一田！毛毛仲記得以前西田food court 有條好大好大嘅柱，上面畫咗個類似不倒翁嘅公仔……唔知有冇人有印象呢？

紅色裝修

而家嘅新城市內牆同地板都用晒冷冰冰嘅白色，懶係high class咁呀，其實以前係用紅色㗎！毛毛細個仲會當啲紅色係熔岩，要跳住跳住咁行，唔可以踩到啲熔岩…… 唔好笑毛毛喇，我唔信你冇咁樣玩過！

青龍水上樂園

青龍真係經典中嘅經典、沙田回憶中嘅XO呀。嗰度有水玩，有茶飲，仲有幸福摩天輪，連神劇《難兄難弟》都喺青龍取過景，不過後來因為生意唔好，所以就執咗，變咗大圍站喇。

青春，真可愛青春

誰的青春不MK？不過沙田友要「潮」，唔一定要出到MK嘅，去東京新幹線同YES! Station咪得囉！以前啲零用錢就係奉獻晒畀YES!卡、大大隻蝴蝶結髮夾（偷偷放喺女神櫃桶）、幸運水晶石電話繩，仲有最重要嘅，影貼紙相！但自從新城市冇晒啲小店，都唔知可以行邊喇。
 

雖然你未必住沙田，毛毛講嘅昔日沙田事物你未必有共鳴，但我哋嘅集體回憶、本土文化流逝緊，係有目共睹嘅事實，毛毛嘅唏噓，你一定明白。

資料來源：沙田區 Sha Tin District