好凍呀好凍呀呀呀呀（打冷震震震中），熱咗成年，終於等到食煲仔飯嘅季節，不過好似話下星期又上返22度喇喎？其實唔止香港㗎，全球天氣都暖咗好多，搞到啲花花都亂晒籠，以為而家已經過咗冬天。

正所謂「不經一番寒徹骨，焉得梅花撲鼻香」呀嘛，即係話梅花要過咗凍冰冰嘅冬天先開㗎囉明唔明呀，通常係晚冬（1月~2月）先開嘅～

但係今年日本嘅梅花已經好心急子咁開咗花喇！香川縣高松市嘅梅花平均會喺於1月20日左右先開花，但今年就早咗成個幾月，破咗最早開花記錄呀！啲梅花真係好靚呀，如果可以同女神一齊睇就好喇…… 算啦講返正經嘢，係就係好靚，但唔好開心得咁早住，咁早開花代表全球天氣異常呀！

香港嘅紅葉都一樣，因為天氣愈嚟愈暖而遲遲唔轉紅㗎。如果你唔想老咗香港會冇咗冬天、你囝囝囡囡會睇唔到紅葉，就環保啲，平時開少啲冷氣喇！

封面圖片來源：ANNnews

資料來源：ANNnews、香港天文台、漁農自然護理署