我哋平日P圖係為咗令自己靚啲，對眼大啲面尖啲，但外國一位攝影師，就運用P圖技巧，令一位失去咗寶貝囡嘅媽媽(Amanda)，再次同寶貝囡重逢。

當攝影師Ashley知道再婚嘅Amanda因為覺得已經離世嘅囡囡見證唔到呢個重要時刻而好傷心，於是就幫佢影一輯婚紗相，喺相入面加上囡囡嘅透明身影，令Amanda可以再次摸到囡囡嘅面珠。

Ashley喺Facebook話，呢一張係佢影過最令佢心痛但又最動人嘅相，多謝上天畀才華佢，可以修補呢一顆破碎嘅心，佢自己都係一位媽媽，想像到如果以後再見唔到囡囡會有幾心痛，所以就好希望安慰Amanda。

Amanda表示，一直都好掛住兩年前離開佢嘅囡囡，雖然只可以喺相中同囡囡重遇，但已經係無價嘅一刻，永遠唔會忘記。

相片喺網絡瘋傳，有網民留言：一個小小嘅善意舉動，足以令身邊嘅人大受感動，為呢個世界增添多一份溫暖。

封面圖來源：Frantz Photography

資料來源：Frantz Photography