老老竇竇，毛毛細個讀書嗰陣已經覺得嗰啲所謂長假期都係呃9細路！鬼咩，一放假啲老師就狂畀功課，又週記又作文，有時放完聖誕假之後仲要考試，說好的放假呢喂！不過台灣嘅細路就好幸福喇，因為噚日台北市教育局宣佈下年開始取消小學嘅暑假同寒假作業呀！

唔單止取消咁簡單，小學生仲可以自己揀做啲咩活動，學踢波又得，齋打機又得，甚至乜都唔做9hea都得！成班網民同家長即刻熱烈地彈琴熱烈地唱：

台北市市長柯文哲仲喺facebook度出咗個好感人嘅post話：「尊重孩子、相信孩子，孩子的表現一定會超乎我們的想像」?！喂講得好呀！

其實毛毛都覺㗎，細路仔好多時嘅創作力量同幻想都會嚇你一跳！之不過香港地嘅小朋友個個都掛住考TSA，仲邊有時間諗其他嘢喎！飯都冇時間食啦！有香港家長就呻話佢個仔嘅聖誕功課都係要做TSA呀，喊出嚟！

係咁唔公平㗎喇，你睇下吳得掂局長可以會都唔開走去日本睇紅葉，我哋同班小朋友就要做到隻狗咁，公平咩？唉，如果吳局長可以趁住搭飛機睇30本書嗰陣抽時間睇下柯文哲臉書講咩，咁就好嚕。

封面圖片來源：小丸子截圖/柯文哲

資料來源：中央通訊社、柯文哲facebook、批踢踢、不願小朋友成為功課奴隸