呢幾日真係好凍呀，凍到毛毛乜嘢都唔想做，但又怕畀腦細發現喎，所以咪對住個mon發吓夢扮諗嘢囉！點知諗吓諗吓，就由細細個諗到而家，發覺其實人生都幾似唔同嘅動畫：

細細個嗰陣冇乜朋友，身邊淨係得啲玩具，當然毛毛都想佢哋會識講嘢，生勾勾咁陪毛毛玩啦，但如果隻公仔真係識講嘢，應該會嚇到毛毛黐線......

再大個少少，開始有唔同嘅Fd子出現，有啲蠢過隻豬，有啲成日掛住食，有啲成日都紮紮跳，有啲就成日灰鳩mode......不過成班Fd子日日無所事事，一放學、放假就一齊9 fing fing、周圍Hea，其實諗返起又幾開心嘅～

再大個啲，有啲朋友毛啦啦變得愈嚟愈生疏，冇乜特別原因㗎，係咁㗎啦～但過濾完啲hi-bye fd後，你就會發現身邊其實一路都有一個好好好好好朋友，有乜心事、有乜冬瓜豆腐、有乜頭暈身㷫生雞眼，都有呢個乜都肯陪你癲嘅老死！

到出咗嚟做嘢之後，人生好似已經冇乜私人時間，每一日都同唔同嘅情緒搏鬥：快樂、憂愁、厭惡、恐懼同憤怒。擔心大頭蝦做錯嘢畀腦細鬧；驚捱成世好L辛苦；點解呢個社會咁多問題？；點解自己咁大個人都一事毛成？......

開心？有拖拍先講啦！喺佢眼中，我哋唔係王子，只係小矮人，仲要係最唔起眼嗰個咋......

不過皇天不負有心人，毒L都會遇上鍾意你嘅人！雖然樣貌從未討好，但就搵到一個人肯欣賞我哋嘅內心，唔介意拖住個「俊？邊L度俊！」嘅我哋，就算喺宴會中著到7下7下都一齊跳返隻舞～

喺香港，冇可能好似動畫咁Happy Ending㗎喇，起碼成世都買唔起間城堡先啦！毛毛呢啲小薯，唯有努力工作，希望第日有個細細哋嘅地方住下、得閒去下旅行，儲夠錢就結婚，有個人陪住我過世，退休之後環遊吓世界咁囉！

咩喎！發吓夢都唔得？你真係惡過腦細！超！你咪又係日日FF，你有女咩？有樓咩？冇就同毛毛一齊返出去畀心機做嘢啦！

資料來源：毛毛嘅白日夢

封面圖來源：reasontostand.org、 i.ytimg、pinterest、kdy.cn