自細就電視汁撈飯嘅毛毛，對於好似睇住毛毛長大嘅鄺佐輝叔叔嘅離世，覺得好難過。

鄺叔叔由80年代至今，拍咗超過100套電視劇集，可以話幾乎每晚毛毛都可以喺電視框欣賞到佢專業而出色嘅演技。今日，不如我哋一齊回顧下鄺叔叔帶畀我哋嘅回憶呀。

要數鄺叔叔最令人印象深刻嘅角色，莫過於佢喺83年飾演嘅尹志平，佢喺劇中專業嘅演技，令毛毛唔少姨媽姑姐到而家都仲覺得佢係壞人，可想而知佢嘅演技係幾咁出色。

但鄺叔叔最深入毛心嘅，都係佢一臉專業咁飾演嘅醫生叔叔角色，亦都係佢喺《十月初五的月光》入面醫好初哥哥嘅～據毛毛翻查維基，不論現代定古裝，鄺叔叔飾演醫生叔叔嘅次數超過15次。

除咗拍劇，毛毛亦都好記得鄺叔叔主持過嘅《都市閒情》同埋《K-100》。

離開咗大台之後，佢去咗HKTV發展，參與過嘅劇集包括有《來生不做香港人》、《三面形醫》同埋《導火新聞線》等等，30多年嚟永不言休嘅精神令毛毛好佩服。

就算鄺叔叔後來驗出患咗腸癌，但依然抱住積極樂觀嘅心境去面對。最後毛毛都想講一聲：多謝你，R.I.P.，鄺叔叔。

封面圖片來源：news.67/sina
資料及圖片來源：維基百科/news.67/sina/蘋果日報/YouTube/ihktv