毛毛細細個就明白路不拾遺嘅美德，但有時都會懷疑，乜呢個世界仲有誠實嘅好人咩？毛毛呢個疑惑，由一位美國餐廳雜工解答咗。

件事是咁的，Johnny係一間餐廳嘅員工，有日喺其中一個位度發現一個信封，一打開原來有成3000蚊美金，即係大約兩萬港紙！畀著毛毛可能都會猶疑一陣，但Johnny諗都冇諗就話畀腦細聽，希望將啲錢畀返失主。

後嚟，嗰位失主真係返轉頭，仲拎得返疊錢，一蚊都無少到！呢次失而復得嘅經歷令佢對人性改觀，仲好感激咁話：「好開心呢個世界仲有誠實嘅人！」

失主為咗多謝Johnny，喺信封度拎咗300蚊美金出嚟報答佢，留低咗張字條：老實人，聖誕快樂！

其實Johnny本身係有財政困難，好等錢使，但Johnny接受電視台訪問時就話：「因為呢啲錢唔係我嘅，我點都唔應該拎，我會用自己嘅努力去搵錢。」

毛毛相信好人一定會有好報，Johnny你將來嘅生活一定會更好㗎！多謝你為我哋做咗個好榜樣呀！

封面圖來源：wwlp.com

資料來源：wwlp.com