噚晚毛毛睇到坤哥攞獎真係好滾動，因為真係感受到佢嗰份苦盡甘來嘅激動呀，坤哥嘅超強親切感，係來自嗰份同毛毛同我同你一樣冇父幹冇後門冇外掛，但係靠自己努力冇路就搵路畀自己行咁追夢，最後真係得咗呀！等毛毛同大家講下坤哥嘅奮鬥史啦！

2007年坤哥中五就喺學校嘅天才表演上面唱歌參賽，踏上咗呢條歌手之路喇。之後佢仲參加過唔同校際歌唱比賽，直到2010年參加TVB歌唱比賽節目《超級巨聲2》拎第五名正式出道！

坤哥喺2010年憑住卡通片《閃電十一人》主題曲《站起來吧》拎到《新城勁爆兒歌頒獎禮2010》嘅新城勁爆兒歌獎，開咗個好頭。

不過之後幾年都未有唱片公司簽佢做歌手，反而做咗好多節目主持同埋拍咗好多劇，好似做《360°》、《勁歌金曲》、《搵食飯團》主持，同埋拍咗好多好多套劇，例如《法網狙擊》、《戀愛季節》、《仁心解碼II》、《情逆三世緣》、《My盛Lady》同《愛·回家》等等，都同唱歌冇乜關係。

最經典嘅一幕係2014年台慶要扮一粒棋，堂堂一個歌手要扮成咁啲網民都戥佢唔忿氣，不過嗰時坤哥就覺得就算係只係做一粒棋都係一個角色，佢話唔委屈，仲好樂觀咁話「做粒棋令到我畀更多人認識」。

呢幾年間，就算冇人簽佢做歌手，冇碟出，佢都冇放棄過唱歌，冇資源冇唱片公司support就自己學埋作樂填詞，冇得派台就自己錄歌放上youtube。

終於喺2014年，有唱片公司簽咗佢，終於有第一首自己嘅派台歌，就係《原來她不夠愛我》，呢首歌仲做埋「香港2015年十大熱門YouTube音樂影片」亞軍，佢個MV有超過346萬點擊率呀！ 呢一年佢仲出咗隻第一隻碟「KWAN GOR 坤哥」，真真正正咁做到一個歌手！！

終於終於，就喺噚晚，喺大台個勁歌金曲頒獎典禮上面，坤哥攞到最受歡迎新人獎金獎！喺台上面喊到眼鏡都濛埋，因為佢終於終於終於得到應有嘅肯定喇！！！

毛毛真係好滾動，因為喺呢一刻終於見到一個歌手應有嘅尊重，見證住努力同付出係會有回報，坤哥！你要加油呀，毛毛等睇你有朝一日攞男金再喊呀。

來源：tvb，chaumafei youtube 片段，Kwan Gor youtube channel