小朋友過聖誕就梗係想收禮物㗎啦，而通常啲爹哋媽咪就會話：「你想要咩禮物，就同聖誕老人講啦！」（之後就知送乜畀佢哋。） 

話說呢，外國有班小朋友就好乖豬咁親自寫信畀聖誕老人，講自己呢個聖誕想收啲乜，有啲寫得好好笑，有啲就內有洋蔥。毛毛英文唔好，但都試吓為大家翻釋啦！

好似呢封咁，由一個3歲嘅小妹妹寫嘅，第一句利申自己呢排好乖女，想要新玩具：一隻玩具狗仔啦、一條玩具魚仔啦、一部粉紅色電話啦⋯⋯而最後一個願望就係，想佢喺天堂嘅爸爸，可以擁抱吓我。 

而第二封呢，就由一位小方丈寫嘅，佢首先就認錯話自己有時唔乖，有時唔記得刷牙，不過呢就有同人講Thank You，有照顧狗仔咁話。咁佢想要咩？佢就話呢，有個小朋友打佢背脊，所以佢就篤返背脊，叫聖誕老人唔好送嘢畀佢：「打人嘅小朋友唔應該有禮物！」 

之後寫信嘅係一位只有15個月大嘅BB囡（由媽媽幫手寫），佢話自己大個囡咗好多呀，成日影相嗰時都會伸條脷出嚟，但就氹唔到人哋笑:(  

呢位小妹妹仲好細心咁講：「希望你嚟嗰陣唔會冷親，我會早啲瞓㗎喇！仲會留定嘢食畀你同鹿仔㗎！ 」

小朋友嘅聖誕真係充滿純真呀，毛毛都要學習吓，同聖誕老人寫信： 

“毛毛呢排好畀心機做嘢㗎！聖誕願望好簡單，就係人工雙倍啦、每個月會有有薪假，十日夠㗎喇，仲有炒咗成日畀嘢我做、無啦啦叫我入房傾偈、放假仲急CALL做Proposal嗰位腦⋯⋯好啦，你明㗎啦，等你呀，聖誕老人，樓下密碼係4689，自己上嚟啦，唔好嘈醒我呀！”

封面圖來源：thesun.co.uk

資料來源：thesun.co.uk