東京喎，出名多奇怪嘢㗎喇，如果有人聖誕節扮到鹿咁出街，都無人會覺得奇怪。但扮聖誕樹？仲要閃下閃下咁？啲日本仔都嚇咗嚇囉！

近排喺東京街頭有棵聖誕樹跑嚟跑去無停過，掛住塊LED板、1500個LED燈，頭上面仲頂住個風車，閃到遠一遠都睇到～

有啲人估佢係幫公司做緊廣告，有啲人以為係行為藝術......呢啲人唔係頭腦太簡單就係太複雜，其實佢只係想扮好一棵聖誕樹咋！

聖誕樹裡面嘅係一個英國傳媒人嚟，佢嘅計劃勁簡單㗎，就係提供一個隨傳隨到嘅「照亮聖誕」服務囉！只要call佢，佢就會去你屋企搞氣氛，仲會播歌或者唱歌畀你聽！

不過目前為止都無咩人搵佢，可能係收人50,000yen一次有啲貴啩～所以佢都係自己鍾意去邊就去邊，繼續做一棵自由自在嘅聖誕樹！隨心帶歡樂畀人！

雖然無呢棵樹咁浮誇，毛毛就買咗呢件聖誕樹衫喇～準備好隨時帶歡樂畀人㗎！仲可以免費上門?～之但係點解今日都未有冇人約嘅......

可能係毛毛唔夠佢誠懇，等我睇多幾次佢呢段片先！

封面圖片來源：Japan Trend
資料來源：Tech Insider、Japan Trend