早兩日有冇出去聽人報佳音呀？平安夜嗰晚，有個教會就去到油麻地天后古廟出面報佳音，仲喺大閘掛晒banner大大隻字寫住「聖誕報佳音」?。

原來呢間教會叫做「福臨教會」，相入面同大家揮緊手呢位係黎振滿牧師～其實喺公共空間舉行任何宗教活動都唔係犯法嘅，但係喺正天后廟門口報佳音，就令到好多人都覺得佢哋唔多尊重其他宗教，甚至係踩場挑機喇。

不嬲都摩擦力超強嘅雲海都有search下呢個教會咩背景，發現佢其實係一間有限公司嚟㗎！仲會link咗去啲奇奇怪怪嘅咩「北京醫科大學」、「神經康復中心」、「平慮解迫安神劑官網」呢啲page。最後雲海仲問，雖然唔知福臨教會同呢啲page係咪真係有關，不過喺天后廟門口報佳音又係咪挑釁呢？

最爆趣嘅係，原來福臨教會個黎振滿牧師，2008年嘅時候曾經喺一個誓師大會出晒力咁叫大家支持梁美芬參選立法會㗎！佢仲話「西九龍係需要美芬」、「美芬係帶住一個天上嘅使命」……嘩真係好肉麻，毛毛痺都骨埋喇！呢位牧師真係超有愛！
 

封面圖片來源：Fuk Lam Church 福臨教會@油麻地、youtube截圖

資料來源：Fuk Lam Church 福臨教會@油麻地、雲海 陳雲海、youtube