俗稱「棚仔」嘅欽州街臨時小販市場行即將被強行清拆，於是毛毛去咗棚仔度搵呢個屬於香港嘅小故事，聽下呢個棚仔對於小販同客仔嘅意義。

毛毛作為一個正宗毒L唔係好識同人講嘢，不過良叔就主動咁同毛毛分享咗好多故事，良叔話佢哋而家只係「肉隨砧板上」。

良叔同毛毛講，38年來呢度嘅小販已經好似一家人咁，日日返嚟睇檔仲多過見屋企人，成班布販感情好好。雖然大家都係賣布，但係大家有唔同鍾意嘅款色，唔會爭生意，佢哋仲會記得邊檔有咩布，叫埋客仔過去幫襯。良叔好鍾意同客仔吹水，吹下咩布整咩嘢咁，佢仲好信得過班學生，有時佢哋帶唔夠錢都會畀賖住數先，佢哋又真係會返嚟還錢㗎喎。不過八月嗰時正苦突然話收返就收返呢度，本來話今年年尾即係幾日後就正或要拆，多得有班學生發起抗爭先可以拖多一陣，因為班學生同佢哋真係有感情。

38年前政府將佢哋安置入去呢個小空間入面做生意，良叔話嗰時四周圍仲係軍營同難民營，冇人流冇生意不特止，夜晚保安叔叔仲要放把西瓜刀喺旁邊驚畀人搶嘢，結果呢班小販由守喺一片爛地到到而家附近終於有大商場有新樓，呢度就再容唔下佢哋呢班小小嘅經營者。毛毛都聽到好Lsad，香港地係咪真係要咁呀？


毛毛又問過整布藝飾品嘅手作姐姐Mary，佢話棚仔好有特色，同一般入舖嘅布行唔同，要自己喺迷宮入面穿梭尋寶咁。好多時啲老闆都會坐喺出面，你睇啱款先打比佢叫佢剪比你，唔會有人看實你催你買嘢，可以自己慢慢揀。Mary姐姐又話棚仔賣嘅布又平又多款，而且唔一定要買一碼，淨係要半碼都可以，呢樣嘢對手作小店嚟講好重要，因為小店唔係大量製作，如果係整頭帶之類嘅小飾物，一碼會好耐都用唔完，半碼就剛剛好，方便手作人可以試多幾個唔同既款。佢話棚仔「啲老闆好得意架，唔怕同人爭生意咁㗎，你冇幫襯都會話你知你想要既布邊間有。」買布嗰時老闆又會教路：「整咩呀整裙呀，呢款整頭帶都靚呀女！」令佢覺得呢度真係好有人情味。


眼見正苦又要謀殺多個生勾勾有活力有情感嘅小社區，轉個頭又成街都係連鎖店，再見唔到小販同客仔打呼招吹水嘅畫面，咁樣好咩？人情味呀，你到底知唔知到咩係人情味呀？錢係買唔到㗎！拆咩啫拆拆拆，畀返個棚仔我呀！嗚嗚嗚......

感謝良記布行、M_Bijoux受訪。