毛毛就唔明納豆呢家嘢有咩好食喇，不過再重口味都有人識欣賞嘅，仲有人鍾意到參加埋抽獎想拎一年份嘅納豆?！

日本有個勁鍾意食納豆嘅網友喺平安夜收到呢封信～一睇就興奮到彈起！毛毛齋睇啲中文字，斷估佢應該係當選咗咩納豆男子，有成365盒免費納豆等住佢食呀。

佢興奮咗成日之後總算收到呢份大禮喇～

不過等等先，納豆好似係新鮮食品嚟過喎～佢望下個食用期限......得返幾日就過期？

無論佢幾唔願意面對，都改變唔到有365盒納豆就過期嘅事實。

就算佢再鍾意納豆，呢個納豆全餐比起天堂更加似地獄喎。

佢已經襯放假周圍塞納豆畀朋友，都仲係剩返266盒呀，過多幾日就過期囉喎？你話佢幾愁呀。Btw，毛毛有個朋友性誕就收到下面呢份大禮，好彩唔係毛毛收到啫，唔係嘅話擺足十年都用唔著呀......

封面圖片及資料來源：sekino920/twitter