毛毛成日聽到啲女同事話要用煮飯嚟收服佢哋嘅男友，不過呢招唔係妹豬專利嚟㗎！台灣就有個男仔煮飯煮到出神入化，仲搞到個女朋友濕晒?！嗱毛毛係指對眼咋！

是咁的，前幾日聖誕節，又係啲情侶喺屋企努力......玩煮飯仔嘅日子，不過呢個男仔就唔畀女朋友插手，仲喺廚房度遮遮掩掩咁忙咗兩個鐘，原來係炮製呢個驚喜聖誕餐呀！

全部都係蛋黃哥嘅原因咪就係因為佢女友係蛋黃哥嘅粉絲囉！佢仲會瘋狂到特登飛嚟香港睇蛋黃哥展覽?呀！本來都好滿足㗎喇，可惜返咗台灣之後香港間蛋黃哥主題餐廳先開張，搞到女友得個酸字......

為咗等女朋友唔使有得睇冇得食，呢個男仔完美重現返流心奶皇包出嚟！佢用紫菜複製蛋黃哥啲眼耳口鼻，仲連餐具都買埋同款！好有心思㗎！毛毛目測都有九成似呀！

可能係個男仔實在煮得太好食，個女仔第二日就上網公開放閃，仲好man咁話「唯有娶男朋友返屋企」！原來識煮飯嘅男仔係咁有market嘅，但係毛毛淨係識煮公仔麵咋喎，係咪代表住呢世都唔會有女仔欣賞毛毛呀？嗚嗚......

封面圖片及資料來源：e61124(yume)/ptt