2016年01月01日 星期五
【強國特色直播技巧】BIGBANG倒數唔見人 偷拍級攝影人呢喂？
韓國大大大團BIGBANG竟然應承喺大除夕上強國跨年節目一齊倒數，間電視台簡直為國爭光呀！中港台一班fans噚晚坐定定，等住男神隔住個mon同自己講新年快樂～等到倒數緊，3、2、1、0，2016！！！咦？等咗一年喇喎，說好的BIGBANG呢？
聽講湖南大台揼足本出天價先請得郁BIGBANG㗎，梗係唔可以用一般嘅方式搞直播啦～接照公佈嘅流程表演完再一齊倒數實在太普通喇！BIGBANG當然要壓軸出場，年都過埋先上臺，夠驚喜呀呢？
當班fans以為等BIGBANG等到第二年已經夠晒驚喜嘅時候，湖南大台嘅天團級待遇安排邊止咁呀～仲有極具現場感嘅偷拍級神秘直播，人樣都睇唔到㗎！
等睇直播嘅家庭觀眾都可以享受到喺觀眾席度感受live一般嘅感受，畀前面啲觀眾個頭遮到得返半個畫面～
睇下！你認唔認到呀，係G-dragon個all back頭呀！
仲影到一隻眼?呀！
唔知攝影師係投入得滯當正自己係觀眾，定唔gur BIGBANG靚仔過佢先影到咁～ 仲搞到班fans新年流流就嬲到狂爆粗，真係唔吉利囉～
封面圖片來源：湖南衛視官方頻道
