唔好話得返一個人用，如果香港有個車站得返一條村仔嘅人用都老早執咗啦。不過喺日本北海道就有個車站竟然淨係為咗一個學生而繼續開，之但係佢嘅任務喺嚟緊春天就完結啦......

話說北海道好大下嘅，人口分佈又唔密喎，所以有啲學生哥住得離學校好遠，返學就一啲都唔輕鬆。

而上白瀧呢個地方得幾間屋同啲田，僻到鐵路公司早就想停用嗰度唯一嘅車站，但係三年前喺附近住嘅一個女仔升咗上高中，開始要日日出市區，間公司竟然為咗呢個學生一個人繼續開呢個站呀！

個車站係無人車站，即係冇站長、冇站務員賣飛，仲要一日得兩班車咋，呢兩班車就係用嚟接個女仔返學同放學！

據啲鐵路迷講，由呢個站去下個站嘅車程長到超過一個鐘㗎～如果無火車嘅話，個女仔都唔知點返學呀！

不過眨下眼就過咗三年，嚟緊三月係日本嘅畢業季節，到時候個車站就會同個女仔一齊畢業，完成佢嘅歷史使命嚕。

為咗一個人去維持一個車站，而唔係唔理居民隨便cut綫，啲人情味真係多到瀉出嚟！搞到毛毛一路迫地鐵一路眼濕濕呀......

封面圖片來源：netgeek
資料來源：netgeek、buzz-net news