據毛記特派駐中國城記者報料，有個巨型嘅金頭髮、金皮膚同金眼晴嘅外國勢力入侵河南呀！

學田北俊細佬話齋，黃皮膚、黑頭髮同黑眼睛先係中國人嘛！不過望真啲，咦，呢個外國勢力嘅樣咁似偉大嘅毛主席嘅？

吓！唔L係啩！毛主席變咗金毛主席，仲要成身都係金色，扮晒外國勢力黃金俠咁樣～

唔好睇少呢個像呀，有成30米咁高㗎！唔知30米有幾高？天壇大佛都係26米左右咋，即係仲高過大佛呀！佢唔止高過大佛呀，建造費仲用咗300萬！不過咁又點吖，都可能係豆腐渣工程嚟啫～

仲有強國人喺金毛主席下體現自拍技巧，咁樣對金毛主席大不敬，小心隨時畀人話顛覆國家之後被消失喎！

唔知點解，毛毛見到呢個金毛主席眼望遠方，突然覺得佢好似會望到毛毛咁～真係好似big brother is watching you……嚇到毛毛個心離一離！毛毛唔想用自己方式去參拜金毛主席呀！！

封面圖片來源：騰訊新聞
資料及圖片來源：騰訊新聞