香港人去旅行影相，通常都係影下嘢食呀、靚景呀咁，擺下fb打下卡就算......但呢對90後攝影師拍擋就唔同呢～佢哋去旅行影相影到喺亞洲電子藝術大賽嘅學生組入面攞咗個優秀獎呀！

睇你哋班廢青都未聽過呢個比賽架喇，等毛毛講解下啦！雖然呢個比賽就叫亞洲大賽，但實際上規模超大，係個世界性、好多人參加嘅比賽嚟，只係比賽主題圍繞亞洲文化先有個咁嘅名啫～

講返兩個咁叻叻嘅攝影師先，聽講佢哋係差唔多畢業嗰陣參加呢個比賽嘅，就算自己嘅資源有限，都決定用超過一個月時間、揸二千公里嘅路，喺日本關東30個景點影足日同夜，整一條記錄住東京夏天嘅縮時影片～

喂，仲未計佢哋事前準備嗰兩個月㗎！

可能有人覺得佢哋只係企係度由朝影到晚，冇乜意念......但佢哋喺呢一個月裡面，就算差啲遇到意外、啲器材壞咗一半，都努力完成埋佢，淨係呢份堅持都值得毛毛大大力畀掌聲佢哋呀！！！

講多無謂，即刻睇下呢段由12,000張raw、42段timelapse組成嘅片：

btw，有冇人可以話畀毛毛知點解成件事可以咁熱血㗎？？？

封面圖片來源：幸福照相館

資料來源：幸福照相館、亞洲電子藝術大賞(福岡)、Kira Waison Lee