2016年究竟要召喚關公幾多次？政府新聞網噚日先搞咗個街道命名比賽，引起一大班網民發揮創意洗版，話口未完今日又出咗個災難POST。

是咁的，個post就Sell 特區護照嘅，想話有咗特區護照，好多國家同地區都可以有免簽證待遇，想周圍去都好方便咁話喎！但毛毛係廢青，覺得去機場都好遠，之後又要Check in，班機仲分分鐘Delay?！一啲都唔方便囉！

好在吳X星，又名吳亮X（嗱，毛毛講得好有技巧㗎！冇開名！），介紹咗出境新方法畀大家，一班心水清嘅網民當然即刻熱心comment啦！

有網民就話嘞，乜出境要護照㗎咩？用自己方式咪得囉！另外就有人話去長洲坐洗頭艇喎，邊度都去到！

有個好大方嘅網民就話，免簽又點，咪一樣畀人當強國人！唔介意畀埋自己個本大家喎！

最最最最最醒嗰位網民，就一言驚醒洛克人咁話，開書店咪得囉！

都話政府新聞網個admin係臥底嚟㗎啦，呢頭講緊出境問題，轉頭就曲線出post，到底係邊個廢青混咗入去！快啲講！

資料來源：政府新聞網Facebook

封面圖來源：政府新聞網Facebook