聽講有唔少後生仔用咗新一代男神留名煒嘅月儲3千蚊大法都上唔到樓呀，唔通想要自己嘅屋仔，真係要去荒山野嶺紮營先得？不過要紮營，都要唔好破壞大自然先得㗎！

噚日（1月6號）facebook group「香港初級行山之友」有網民post咗幾張相，話見到班人用電鑽同爆炸螺絲喺大東爛頭營石屋頂起咗5個營，覺得佢哋「自私到爆」！

毛毛就同網民Ka Chung Tam哥哥傾過計，佢話自己同幾個朋友行上大東山，沿途見到另一班10幾人嘅山友，仲同佢咃有講有笑，覺得佢哋都幾nice。點知上到山就見到佢哋爬咗上石屋屋頂紮營，仲聽到有人問點樣穩固啲，另一個人就答話用電鑽同爆炸螺絲！Ka Chung Tam同朋友見到就走埋去同佢哋講咁樣好危險㗎啵，但佢哋就只係笑笑口咁話：「唔怕啦我哋都唔驚死」。

唔係呀嘛，唔通真係有人用電鑽起營？！友台《蘋果日報》就搵到紮營當事人，原來佢哋講嘅「電鑽」係個樣好似電鑽工具箱嘅打邊爐爐具工具盒啫～好彩只係一場誤會！

不過咁，石屋都需要愛㗎！之前已經有山友驚石屋屋頂頂唔順會冧落嚟，post過相呼籲大家唔好再爬上去～就算唔係用電鑽起營，爬上去都一樣好危險㗎嘛～

大家真係要好好愛惜我哋嘅大自然呀！市區啲樹又畀正苦斬斬斬，郊外大家又唔珍惜嘅話，係咪想香港得返樓、樓同樓呀？

封面圖片、資料來源：Ka Chung Tam/香港初級行山之友、蘋果日報

延伸閱讀：【緊急呼籲】唔好再爬上大東山石屋喇下