毛毛曾經以為自己已經看透咗世事，愛情呢家嘢，嚇毛毛唔到嘅！但係泰國有對情侶嘅故事，就完全令毛毛重拾返對人性嘅希望呀！

呢對泰國情侶本身已經plan好咗要結婚，場地婚紗等等都預備好晒，可惜人算不如天算，婚禮舉行前夕，男方突然心臟病發逝世，留低未婚妻一個喺度。

「剩下自己，怎可走到尾？」未婚妻都話估唔到前幾日仲同佢計劃緊將來嘅人，突然間話走就走。人，其實真係可以好脆弱。為咗愛、為咗承諾，未婚妻最後仍然決定披上嫁衣完成婚禮，作為對未婚夫嘅最後告別。現場嘅人都為咗呢份真摰嘅愛情而感動落淚。唉，毛毛隔住個mon都睇到眼濕濕呀。

未婚妻將呢件事放咗上自己facebook，而家已經有2萬幾個人like，過千個留言。大部份人都係話好感動，同埋希望未婚夫喺天上安息。（嗱唔好問毛毛點解識睇泰文，呢個世界有Google Translate嘅）

其實能夠搵到自己嘅真愛真係好難得，毛毛連假愛都搵唔到呀……嗯……冇package囉……

封面圖片來源：Nan Thippharat

資料來源：Nan Thippharat、gotv