金正恩金仔前幾日放咗個氫彈，同全世界拜咗個早年之後，又創造咗個新神話呀！

今次係奪得北韓最佳穿著男士大獎呀！北韓新聞社嘅官方twitter 話，金仔已經係連續第五年攞到呢個獎㗎喇！絕對實至名歸，肯肯定冇造馬，公平公開公正嘅程度仲勁過毛記分獎典禮呀！唔係講笑，你睇下金仔可以連續幾年都keep住同一style，對時裝有一種執著，忠於自我，唔會隨波逐流，呢樣嘢唔係人人都做到㗎！

之前仲有時裝品牌推出金仔嘜頭嘅衫?！幾有影響力呀！

不過計毛毛話，金仔又點止著衫帶領潮流吖，佢個髮型都非常出色囉！

起晒角嘅髮型，反映出金仔對呢個世界嘅控訴；清楚的分界，突顯出金仔黑白分明嘅性格，最重要嘅係，呢個頭，只有金仔先可以carry到，其他人係做唔到呢個效果㗎！就算係男神碧咸都係咁話喇！

你話喇，又有家底，著衫又靚，聽講佢細細個仲識揸戰機?！呢個package真係不得了呀！吖金仔，唔知點解，毛毛覺得你隻眼真係好靚……

封面圖片來源：DPRK_News

資料來源：DPRK_News、自由時報