2016年01月10日 星期日
林鄭親親假海豚 網民：真嗰啲死晒喺你手
毛毛之前諗住去大嶼山睇海豚，點知上網一查，啲人話出到海都唔一定睇到喎！不過林鄭就推介咗個新嘅睇海豚地點畀大家，仲保證一定睇到、影到靚相?！係就係海豚，不過係假﹒海豚囉！呢個喺大埔嘅海豚5D畫，啲海豚條條都死魚咁，郁都唔郁，啱晒影近距離合照啦！林鄭今日出席活動嘅時候仲表演咗攜手踐踏海豚嘴?呀！
親親假海豚咁方便，林鄭又帶頭玩得咁開心，無咩唔好吖？點知班網民係都唔肯去舊迎新，係都要提啲遲早係過去式嘅真海豚呀。
好在都唔係個個網民都咁退步啫，有啲見林鄭介紹新嘅睇海豚方式，就改晒圖支持佢呀！好似呢張就模擬增設假大白鯊5D畫，真係好有動感呀！
呢張就P林鄭就走往條天國嘅階梯，好立體、好生動！就好同跑道隔離班真海豚一齊上天堂留返畀佢嘅地方咁呀！
呢張林鄭踩某位腳痛醫生啲穴位圖雖然有少少離題，不過大家都仲未忘記關心佢，寵竉一定好開心啫～
唉不過都係關心返啲真海豚先啦，條極都未起完嘅港珠澳大橋，橋影都未有，就已經將啲海豚趕走晒咁滯，起之前明明每日都仲記錄到有20條海豚出沒，而家得返0到1條咋！
之後起埋三跑，海豚每日經過嘅海域就會大縮水，仲會有大把船經過，唔走唔得?！
而家幅5D畫啲假中華白海豚生得幾樣衰都好，遲啲都冇真海豚做比較架喇！到時有假海豚你睇，都真係要感恩呀！
