如果生日收到數獨書做禮物，毛毛一定望都唔望就揼埋一邊囉！你當毛毛仲細咩？呢啲咁辛苦嘅嘢梗係留返畀啲繁忙兒童做㗎啦！

日本就有個阿哥，可能覺得自己細佬唔夠繁忙，就好有心咁自創咗個解難題畀佢做生日禮物，實行等佢生日都冇得唞呀！

個細佬又唔知係咪做補充練習做到麻木咗，竟然乖乖地係咁解、係咁解......毛毛都睇唔明佢做咗啲乜，不過最後竟然解咗個QR-code出嚟囉。

於是佢拎部電話出嚟Scan下個QR-code，睇下有咩玄機。

翻譯出嚟嘅原來係一句「生日快樂」呀！

呢張新型生日卡，裡面全部都係時間同心血，仲有兄弟情?！如果呢個細佬好似毛毛咁懶得解題目嘅話，就呢世都唔會發現到阿哥嘅心意㗎喇！嗯，照咁講，女神仲未留意到毛毛送畀佢嘅生日卡，應該都係太懶啫......好似係。

封面圖片及資料來源：arutu_R2/twitter