講起小巴司機大佬，除咗林雪，一定就係諗起佢哋亡命飛車嘅英姿喇～但毛毛要介紹要呢位司機大佬，唔止又型又英，仲好有愛！

有網民喺「盡在元朗」post咗張相，話有個小巴司機見到燈位前面有位拾荒婆婆架手推車冧咗，就即刻落車幫婆婆扶返好架車仔，同埋執返好啲物品～

原來呢位司機大佬出咗名nice㗎～無論對老人家定小動物都一樣咁好，網民甚至話因為有呢個大好人，「住大棠嘅都覺得光榮呀」～

另外仲有位巴士司機，因為好人好事畀網民post上網大讚啵～話說有個網民見到有3個學生哥搭錯巴士想過馬路去返對面車站嘅時候，就有個巴士司機出現，帶佢哋去返總站搭車～真係超nice呀！如果毛毛搭錯車都有叔叔幫就好喇～

原來香港人係咁有愛嘅，毛毛真係勁感動，嗚嗚。成日聽啲港女話做咩咩咩職業嘅男人package唔夠好，毛毛就話，其實心地好，贏晒。

封面圖片來源：Chan Chun Wai‎/盡在元朗

資料來源：盡在元朗、上水粉嶺人分享會