呢幾日全世界都一齊凍，連香港都凍到得幾度，好似毛毛呢啲廢青就梗係留喺被竇入面啦！咁嘅天氣仲玩戶外活動？你以為個個都有北海道嘅老人家咁壯咩！

連啲住喺明尼蘇達，應該凍慣咗嘅美國人呢幾日都頂唔順個寒流，咩滑雪、溜冰都無人玩呀！之但係就興緊樣新活動喎，就係一出屋企門口就玩得嘅「急凍牛仔褲」！喂，又話怕凍嘅？出去雪硬條褲就唔凍咩？

事緣有個人見自己個鄰居一到冬天就心情麻麻，為咗氹佢開心，由幾年前嘅冬天開始，天氣一夠凍就整濕自己啲牛仔褲，喺街度一邊震、一邊雪凍條褲，仲擺唔同嘅造型出嚟?～

佢今年將自己整嘅新作品擺咗上fb，唔知係咪凍到有共鳴，好快就呃到好多like同share，仲開始有人學佢玩急凍牛仔褲！

而家唔止明尼蘇達周街都係牛仔褲，遠到喺加拿大都有人試緊整牛仔褲雪條呀！實行用結冰牛仔褲暖下左鄰右里！

喺香港，大帽山嗰邊已經結晒霜，話唔定香港都有得玩喎？之不過香港人都唔係凍慣，都係學毛毛咁，照常扮工玩fb先係最暖最安全呀！

封面圖片來源：Matt Field/twitter
資料來源：Daily Mail、Mashable