天氣凍到好似喺雪櫃咁，唔好話出街啦，毛毛連被竇都唔想出呀！但竟然有班傻人，凍冰冰唔留喺屋企，去咗東龍島喎！嗱，唔好以為佢哋係去睇雪呃like呀，佢哋係去執！垃！圾！呀！

嘩嘩嘩！呢度究竟係東龍島定垃圾堆填區呀，咁L多垃圾嘅？

發泡膠、膠樽、廢木乜乜乜都有，啲人真係好冇公德心囉！

帶頭嘅龍舟隊「泛非龍」教練胡梓康率領同行嘅40個義工，攀繩落「垃圾灣」執垃圾，落到去，班義工連崖邊暗角嘅垃圾都唔放過㗎～

話咁快，已經執咗一大袋垃圾出嚟！

執垃圾都未算難，最難係搬返上山呀嘛！條路咁難行，又要靠繩索同人力拉先搬得走咁L大袋垃圾，仲要唔止得一袋垃圾喎，搬完一袋仲有另一袋等緊......

義工將啲垃圾一袋一袋咁拉返上山，唔好睇少拉繩索呢個動作，要出好多力㗎，仲要喺寒風吹嘅情況下拉喎，冇返咁上下意志力都頂唔緊啦！好在有一大班義工幫手拉，呢個毛文，毛毛隔住個mon都感受到人間溫暖呀！

班義工仲會好細心咁幫啲垃圾分類?，白色膠紙就代表入面裝嘅係發泡膠、啡色膠紙就係膠樽～

執咗半日，終於成功執咗大約120袋垃圾，運去碼頭等食環署船將啲垃圾運走，不過唔好以為咁就完呀，其實120袋垃圾都只係三分一嚟咋！

執完之後果然乾淨咗好多呀，真係辛苦晒班義工！其實呀，只要每個人都做多少少，班義工咪唔使天寒地凍都要去執垃圾囉，自己垃圾應該自己執㗎嘛！

封面圖片、資料及圖片來源：Chu Hon Keung‎/再見垃圾桶！